Со низа културни настани Охрид и оваа година се вклучува во одбележувањето на 9 Мај – Денот на Европа, односно денот на победата над фашизмот во Втората светска војна.
Во организација на Општина Охрид и Делегација на ЕУ ќе биде отворена Инфо-точката на ЕУ во Општинскиот инфо-центар, каде обраќања ќе имаат амбасародите на Шведска и на Холандија Ларс Валунд и Мариет Схурман. Потоа активностите продолжуваат на Градскиот плоштад, каде е предвидена пригодна програма, збогатена со настапи на културно-уметнички друштва, хорови и млади уметници од општинските основни и средни училишта.
По повод Денот на Европа утре во Изложбениот салон на Центарот за култура „Григор Прличев“ пригоден концерт ќе одржат уметниците Бакревски и Ѓоревски од „Дуо кларинети“.
Во организација на Амбасадата на Шведска, Делегацијата на ЕУ во Република Македонија и Културно-изложбениот центар „Култура 365“ ќе се одржи и детско читачко катче. На тој собир што ќе се одржи во просториите на „Култура 365“ ќе биде презентирана литература за деца од шведски автори.
Победата над фашизмот ќе ја одбележи и Центарот за култура „Григор Прличев“, со ревија руски филмови насловен „Војна и мир во рускиот филм“.
Организатори на ревијата се Филмскиот фонд на Македонија во соработка со Руската амбасада, Рускиот културен центар од Софија, Министерството за култура, Кинотека на Република Македонија и Центарот за култура „Григор Прличев“ од Охрид.
Ревијата на руски филмови стартува на Денот на победата над фашизмот – 9 мај, а во нејзини рамки ќе бидат прикажани филмските остварување „Ние сме иднината“, „Поп“, „Една Војна“, „Ѕвезда“, „Ослободување“ и „Летаат жеравите“.