Европскиот суд за човекови права соопшти дека затворањето на поранешната премиерка на Украина Јулија Тимошенко е политичко мотивирано, незаконско и претставува кршење на човековите права.
По денешното читање на судската одлука за случајот кој ги влоши односите на Украина со Европа и со САД, претставникот на украинската Влада ја напушти судницата.
Европскиот суд смета дека затворањето на Тимошенко е незаконско и оти лошо се постапува со неа.
– Судот смета дека затворањето е самоволно и незаконско во текот на целиот период, гласи заклучокот на Европскиот суд.
Непознато е дали одлуката на судот во Стразбур ќе биде правно обврзувачка за Украина.
Тимошенко, една од лидерите на украинската продемократска „портокалова револуција“ од 2004 година, е осудена на седум години затвор, во октомври 2011 година поради злоупотреба на службената положба и потпишување на штетен договор за гас со Русија, додека беше на премиерската функција.