Жешко надвор, но жешко и напнато е и во собраниската сала.
Опозицијата и власта никако да најдат заеднички јазик. Незавршени седници, многи извештаи со отчет на институции и барања за информации или законски предлози од опозицијата ,сето ова само ја зголемува нервозата.
За опозицијата е несфатлив укорот од спикерот од Велјаноски дека се кочничари на работата на законодавниот дом со многуте предложени закони, за опозицијата Велјаноски е само марионета на Груевски, а тие ќе продолжат да предлагаат закони кои се, велат, за подобрување на живеачката на граѓаните.
Најавија нов пакет закони, а Велјаноски се надева до одморите да ги заврши сите седници, меѓу нив и нова на која ќе се носат нови изборни правила, за кои опозицијата се уште не е информирана, но и дебата по информацијата за , како што стои во материјалот потпишан од СДСМ, НСДП, ЛП и ПЕИ и СЛ: „ Незаконското и расипничко трошење на пари за забеганиот проект Скопје 2014“.
Нервозата се зголемува и од барањата на опозицијата за паузи. ДПА бидејќи на Собранискиот канал не може да се слуша нивниот мајчин јазик, а СДСМ, како што велат поради однесувањето на Велјаноски.
Зијадин Села од ДПА, и сугерираше на колешката од ДУИ, потпретседателката на Собрание, Сузана салиу, од народниот правобранител, чиј извештај се разгледуваше, да побара заштита од дискриминација, бидејќи Велјаноски досега не и дал да претседава со собраниска седница, а тоа повеќе пати го прават Јакимовска и Макрадули.
Според најавите и според деловникот, август е месец за одмор за народните избраници.