Со посредство на Агенцијата за вработување (АВРМ), во просториите на локалната самоуправа во Прилеп беа доделени договори на работодавци и лица за обука кај познат работодавач во рамките на проектот: “Субвенционирање заради вработување”.
Овој проект за првпат се спроведува меѓу прилепчани. Основната цел е да се поттикнат невработените лица за работен ангажман, како и поттикнување на работодавците да спроведат обука на невработените лица на соодветен период и потоа трајно да ги вработат.
Вработувањето ќе биде субвенционирано од Владата за период од 6 месеци. Во 14 прилепски фирми ќе бидат обучени и ќе се вработат 63 невработени лица, кои повеќе од 1 година биле евидентирани во Центарот за вработување. Најголем интерес за вклучување во овој проект пројавиле фирмите од текстилната и од преработувачката индустрија.
По завршувањето на обуката, за вработените лица ќе биде обезбедена субвенција преку финансиска поддршка за секое вработено лице во бруто-плата во износ од 13 000 денари месечно за период од 3 месеци, со обврска на работодавецот да ги задржи овие лица на работа во наредните 12 месеци, како и да не го намали бројот на вработени на неопределено време во рок од 1 година – изјави директорката на АВРМ, Силвана Пашоска.