Во дворот на тетовската полиција започнати се активности за подобрување на пристапот до трите згради на оваа институција за лицата со хендикеп, како и за хортикултурно уредување.
-Во дворот на СВР Тетово се планира да се обликуваат и посебни патеки за непречено движење на лицата со хендикеп и за нивен полесен пристап до службите за издавање лични документи. Во план е, исто така, да се обликуваат и две отворени чекални, каде граѓаните ќе можат да пополнат обрасци и да се засолнат од Сонце или дожд, потенцира Марјан Јосифоски, портпарол на СВР Тетово.
Од активностите за средување и разубавување на просторот пред и околу трите деловни објекти денеска биле засадени десетина нови украсни дрвца.
-Идната недела ќе се постават и нови клупи за седење, како и наменски систем за наводнување на зеленилото, информираше Јосифоски.
Од Секторот за внатрешни работи Тетово потенциртат дека и во иднина ќе се работи на подобрување на вкупните услови за работа и за давање услуги на граѓаните.