Давањето под закуп на паркинг просторот во Охрид ќе биде оспорен, најавуваат од Кабинетот на градоначалникот на Охрид д-р. Николa Бакрачески. Оваа одлука доаѓа откако завчера во централното градско подрачје компанијата „Сузуки” повторно започна да наплаќа за паркирање.
Во текот на днешниов ден беа поставени и рампите кои беа остранети пред три месеци. Оваа компанија почна да го користи паркингот повикувајќи се на договорот од 05.07.2012 година потпишан со Ј.П. „Биљанини Извори”.
„Договорот за давање под закуп на паркинг просторт во центарот на градот, кој е потпишан и чие правно дејствие се врзува со поранешниот градоначалник Александар Петрески и лицата блиски до него, е акт со кој екстремно се кршат интересите на локалната самоуправа и на граѓаните на Охрид.
– Давањето на управување на паркинг просторот на приватен субјект за Општината претставува штетен договор донесен под сомнителни околности, во една нетранспарентна постапка и него го оценуваме како акт со кој се нарушуваат интересите на општината и на граѓаните. Токму поради тоа Општина Охрид, ќе ги преземеме сите законски средства за да се оспори овој штетен договор, а сите оние инволвирани лица кои со потпишувањето на договорот свесно направиле злоупотреба на својата позиција и штета по имотот и угледот на локалната самоуправа ,ќе покренеме постапка за нивно санкционирање”, велат од Кабинетот на градоначалникот Бакрачески.
Мики Трајковски