Со голем огномет, славеничка торта на која пишуваше „Засекогаш со тебе“ и неколку блех оркестри, струмичките социјалдемократи синоќа ја прославија победата на локалните избори.
Стотици и стотици членови, симпатизери и поддржувачи на градоначалникот Зоран Заев, луѓе од сите возрасни групи, се собраа на едно место, се радуваа на победата, но и на иднината на Струмица, затоа што по трет пат ќе ја води човекот кој ја направи најдобра општина и најпосакувано место за живеење во Македонија. Низ испомешаните звуци од блех оркестрите, ечеше „Зоки,Зоки“, а кулминираше кога на бината се качи градоначалникот Зоран Заев, долго траеше аплаузот и скандирањето на неговото име, а тој им врати:
-Се гордеам со вас, победата е заедничко дело и ви ветувам дека ќе работиме уште повеќе за нашата Струмица. Како и досега, така и од сега, секогаш ќе бидам тука за вас и за сите граѓани во општината, заедно да ги решаваме проблемите и заедно да ја градиме иднината на Струмица, рече Заев.
До доцна во ноќта струмичани ја славеа победата и се гордееа што по трет пат го имаат Зоран Заев за градоначалник.
