Интензивно се мие и дезинфицира пред фреквентните места, маркети, аптеки, пазарче и банки во Општина Карпош. Активно работат четири цистерни, две на локалната самоуправа и две – донација од компаниите „Анизор“ и „Гранит“, информираат од Општина Карпош.
„Вчера, се миеја површините околу пазарчето во Тафталиџе, како и пред влезовите на сите околни маркети на овој потег, но и во другите населби. Целта е да се дезинфицира просторот каде што е присутна поголема фреквенција од граѓаните“, велат од Карпош.
Од Општината ги повикуваат сите граѓани да се придржуваат до препораките за заштита од коронавирус. Да го почитуваат полицискиот час и навремено и точно да се информираат за сите дополнителни мерки преку официјалните канали за комуникација на институциите.