За петмина скопјани, Основното јавно обвинителство Скопје поднесе предлози за издавање казнени налози, сите за непостапување според здравствените прописи за време на епидемија. До Судот е предложено секој од нив да плати казна по 2.000 евра.
Како што соопштија од ЈО, по пристигнување од земји со висок и среден ризик на 16, 17 и 18 март, секој од обвинетите потпишал изјава со која прифатил да се самоизолира во својот дом во период од 14 дена. Но, при проверките направени на 18 и 19 март, од страна на овластени службени лица, не биле затекнати на наведените адреси.
– Обвинетите, иако должни да ги имплементираат мерките определени во Писмена наредба на Министерството за здравство за сузбивање или спречување на епидемијата на коронавирусот – Ковид-19, како и обврската од потпишаните изјави за самоизолација, не постапиле согласно предвиденото, со што го сториле кривичното дело, се истекнува во соопштението.