Чешкиот производител на автомобили „Шкода“ објави први фотографии и технички карактеристики на редизајниарниот модел Суперб и Суперб Комби.
Според очекувањата Шкода по четири години од појавувањето на пазарот ја освежи и втората генерација на својот најголем модел.
Предниот дел на автомобилот е редизајниран во согласност со препознатливите детали на „Шкода“ од другите нејзините модели. Измени има на предната маска од ладилникот, браникот, поклопецот на моторот, а светлосните групи освен изменет подолг облик имаат и би-ксенон фарови и дневни ЛЕД светла.
Задниот дел на Суперб е модернизиран така што измени има на задниот поклопец, браникот и стоп светлата, кои сега имаат графика во ЛЕД технологија.
Освежување има и во внатрешноста на возилото, така што сега се достапни 9 различни варијанти на ентериерот, а понудата вклучува и избор меѓу трикрак и четирикрак управувач. Како опција е достапен и кожен пакет.
Изборот на мотори е пренесен од актуелниот Суперб, но кај некои погонски единици е подобрена економичноста, така што потрошувачката на гориво е намалена до 19 проценти.
Шкода како пример го наведува тоа дека 1,6 литарскиот ТДИ Гринлајн, сега има потрошувачка од само 4,1 литри на 100 километри.