Откако министерот за здравство Венко Филипче го повика Министерството за внатрешни работи денеска да објави соопштение во кое ќе се најават санкции за сите корисници на социјални мрежи кои шират дезинформации за коронавирусот и за медиумите кои ги пренесуваат, МВР вечерва испрати соопштение со кое ги осуди „лажните вести“.
Сепак, во соопштението нема никакви детали за тоа според кој закон и како ќе бидат санкционирани граѓаните и медиумите кои шират дезинформации. Освен што се вели дека „ќе нема компромис во санкциите“, нема прецизно објаснување какви ќе бидат тие.
„Лажните вести кои создаваат неоснована паника имаат долгосежни последици и врз општествената состојба но и врз колективното здравје на граѓаните. Ваквите злоупотреби ќе бидат законски санкционирани затоа што на овој начин се вознемируваат граѓаните и се создава непотребна паника. Нема да има компромис во санкционирањето на оние кои свесно шират лажни вести“, се вели во соопштението на МВР.
Од Министерството апелираат до медиумите и корисниците на социјалните мрежи да се повикуваат единствено на официјално објавените податоци од надлежните институции и за сите потребни информации да се обратат до Министерството за здравство, секторот за односи со јавност во Владата или останатите релевантни институции, кои постојано ја информираат јавноста со обновени податоци неколку пати во текот на денот.