Советникот на косовскиот премиер, Азем Власи оцени дека по последната рунда на разговори помеѓу Белград и Приштина во Брисел, состојбата на север на Косово е конфузна и напната и дека од неа може да произлезат немири.
Според него Србија треба да започне со менување на своите ставови, за решавање на косовското прашање.
-Или Србија ќе ги смени своите ставови во поглед на нереалните барања или се ќе остане како што беше. На Србија и се брза, кон европската интеграција, според тоа таа треба да ги смени ставовите, а не Косово, изјави тој за агенција „Анадолија“.
Тој истакна дека ниту една власт не може да се меша во внатрешните прашања на Косово, па ниту на север каде што има три мали општини со српско население.
Според неговите зборови Приштина никогаш нема да прифати на север на Косово да се пренесат и некои клучни државни ингеренции како што се полицијата и судството и дека кој и да се приклучи во дијалогот,позицијата на Косово ќе остане непроменета.
-Од САД, Брисел, Германија и други членки на ЕУ имаме поддршка за укинување на паралелните нелегални институциина север на Косово, кои Србија ги поддржува и да се прошират уставните надлежности на Косово и на тој дел да се воспостават некои форми за соработка и организација- изјави Власи.
Елена Георгиевска