Кандидатот за градоначалник на општина Велес од коалицијата „За подобра Македонија“, предводена од ВМРО-ДПМНЕ, Славчо Чадиев доби поддршка од избраните градоначалници во Вардарскиот плански регион од првиот изборен круг.
Славчо Чадиев денеска оствари средба со шесте избрани градоначалници од Вардарскиот плански регион: Чашка, Свети Николе, Градско, Неготино, Демир Капија и Росоман, со кои разговараше за тоа како во наредните четири години подобро би се развивал Вардарскиот плански регион.
– За времето на владеењето на Црвенковски и Георгиевски во нашиот град и во повеќето општини во регионот, доста лица останаа без работа и затоа јас како иден градоначалник на Велес имам подготвено низа проекти преку кои ќе работат на подобрување на состојбата, потенцираше Чадиев.
Од името на сите шест избрани градоначалници од Вардарскиот плански регион, поддршката за Чадиев ја изрази градоначалникот на општина Чашка, Горанчо Пановски кој потенцира дека Чадиев во вториот изборен круг треба да биде избран за градоначалник на општина Велес.
– Во Велес се наоѓа административниот центар на Вардарскиот регион па затоа потребна ни е поддршката од граѓаните за да продолжиме во иднина со реализација на проектите, истакна Пановски.
Чадиев вети дека општина Велес во соработка со сите заедници на станари на станбените објекти во градот ќе ги замени старите влезни врати со нови модерни пвц врати.
– На сите станбени објекти во градот ќе се постават енергетско – ефикасни, а во соработка со ЈКП Дервен ќе се уредат дворните места пред сите станбени објекти, односно хортикултурно уредување, поставување клупи, осветлување и друга урбана опрема, рече тој.