Косовскиот премиер Хашим Тачи изјави синоќа дека Приштина била подготвена за договор, но колебањето било на страната на Белград. Тој најави дека новата рунда од дијалогот може да биде одржана во почетокот на следната недела доколку Србија ги прифати принципите на Приштина.
Тачи во Брисел по завршувањето на осмата рунда од дијалогот со Белград со посредство на ЕУ, изјави дека се надева оти „Србија следните денови ќе ги сикористи сериозно да размисли и дека договор ќе биде постигнат“.
Според него, Приштина изложила идеја која е позната во јавноста и била „максимално великодушна“, јави Танјуг.
– Сакам да кажам дека асоцијацијата (општини) нема да има извршни и законодавни овластувања, а подготвени сме да понудиме се што е во согласност со уставот на Косово. Ако Србија прифати принципи, следната рунда ќе биде во почетокот на следната недела, изјави Тачи. Додаде дека денешните средби не биле лесни бидејќи имало нови учесници кои како што рече, не ја прифатиле реалноста на Косово.
Тачи изрази задоволство поради тоа што ставовите на Приштина, како што потенцира, се согласни со ставовите на ЕУ и САД.