Република Македонија во графата државјанство во биографијата на техничкиот министер Наќе Чулев била причината поради која тој е споменат во вербалната нота од Грција. Министерот за надворешни работи во неделата извести дека добиле вербална нота од Грција за непочитување на Договорот од Преспа од страна на министрите за внатрешни работи и труд и социјала. За министерката за труд и социјала Димитров сугерираше разрешување ако не го поправи однесувањето, односно доколку не постави табла со уставното име на државата во Министерството, но не соопшти детали за причините поради кои во вербалната нота е споменат министерот Чулев.
Министерот Чулев вели дека веќе имал средби по вербалната нота.
„Се сретнав со амбасадорот. Имаат забелешки на тоа што во мојата биографија сум пишал Република Македонија. Исто така, замериле што вчера во Охрид во канцеларијата каде што сме се појавиле имало стар амблем од Министерството, а истиот го има на многу места“, рече министерот Чулев.
На прашањето дали ќе преземе мерки по забелешката и ќе направи измени во биографијата, Чулев вели „Мојата биографија е мој приватен документ, не од државна институција“.
Биографијата на Чулев е објавена на официјалната веб-страница на Министерството за вантрешни работи.
И министерката за труд и социјала Рашела Мизрахи рече дека нема да ја менува таблата и покрај предупредувањата дека на неа недостасува уставното име на државата.