Независната граѓанска листа за советници во Советот на Општина Гевгелија од коалицијата „Сите сме Гевгелија“ во својот кандидатски избор за членови на највисокиот орган на локалната самоуправа во Општината истакнала непостојно лице како свој кандидат.
На рекламниот флаер на оваа независна граѓанска листа, кој се дистрибуираше деновиве низ Гевгелија, на местото под реден број 19 стои името на Јовче Гулев, роден 1983 година, невработен и негова фотографија, која ги збуни сите гевгеличани, бидејќи такво лице не постои во Гевгелија, освен во архивата на Гугл.
Со отварањето на фотодокументацијата на Гугл излегуваат податоци за лицето од фотографијата:тој е светски манекен за фризури и актер, секако не од Македонија, а воопшто не од Гевгелија, со име и презиме Логан МекНил од Вирџинија – САД.
Поголемиот дел од граѓаните на Гевгелија низ социјалните мрежи веќе почнаа да ја исмеваат листата како обид за груба манипулација со гласачите. Дел од нив обвинуваат дека за ваквото лажирање на податоците и лажните памфлети што се делат низ градот треба да одговараат организаторите на изборната кампања, коалицијата „Сите сме Гевгелија“ чиј носител на листа е Лилјана Карајанова.
Како овие лажирања поминале низ строгиот кандидациски процес во органите на Државната изборна комисија, е посебно прашање, кое не смее да остане неодговорено.
Се на се, гевгеличани реагираат дека не заслужуваат вакви измами од своите сограѓани, особено не од лица што имаат намера да учествуват во креирањето на локалната политика на Општината.