Миле Јовановски по распитот во судот рече дека не чувствува вина за случајот со Меѓународниот сојуз, каде е осомничен за перење пари и измама. Тој ги поздрави новинарите велејќи им „Среќна нова ‘49“.
Неговиот распит кај обвинителката Вилма Русковска траеше еден час. Тој не знаеше дали истрагата е завршена.
Јовановски не одговараше на повеќе прашања, велејќи дека ќе даде изјава на прес-конференција која најверојатно ќе ја закаже за наредната недела.
Подоцна на распит треба да дојде и неговиот син Бојан Јовановски кој со полиција треба да биде спроведен од затворот Скопје во Шутка. На распит треба да се појави и асистентката Христина Блажевска.
Пред нив, исказ дадоа Јасна Мандиќ која беше заменичка на Бојан Јовановски и пратеничката Фросина Ременски која е почесен претседател во сојузот.
Истрагата за овој случај не е завршена, а осомничените минатата недела правеа увид во доказите за да се подготват за давање исказ.
Обвинителството ги сомничи за делата „измама“ и „перење пари“. Адвокатот на Јасна Мандиќ по распитот кај Русковска рече дека таа била донесена во заблуда од Боки 13, а пак, пратеничката Ременски очекува Обвинителството да ја запре постапката против неа.
Русковска најави обвинение за овој случај на почеток од идната година.