Кандидатот за градоначалник на Карпош од ВМРО-ДПМНЕ и коалицијата „За подобра Македонија“, Јагнула Куновска вечерва ги запозна жителите на Бардовци и Злокуќани со проектите кои ќе се реализираат во ова населено место, кои се во општинска надлежност, а и оние кои се во соработка со Градот Скопје.
– Ќе реализираме многу проекти кои ќе бидат од витално значење. Меѓу нив се проектите за реконструкција на ракометното игралиште, реконструкција на Психијатриската болница во соработка со Владата на Република Македонија, рече Куновска.
Таа вети нов зелен пазар за жителите на Злокуќани и Бардовци, изградба на фекална канализација, асфалтирање на патот до православните гробишта, како и промоција на локалитетот Скупи.
На денешниот мини-митинг се обратија и заменик-претседателот на Владата на Република Македонија Зоран Ставрески, претседателот на Општинскиот комитет на ВМРО-ДПМНЕ на Карпош Синиша Спасов, носителот на советничката листа на Карпош Сашо Лазаровски, како и советниците од Град Скопје Есма Реџепова и Ирена Мишева.