Кандидатот за градоначалник на Охрид од коалицијата „Сојуз за иднината“, Александар Петрески денеска оцени дека сите ветени и нереализирани проекти од страна на централната власт се „грдо лице на градот“.
– Грдото лице на Охрид е детската болница во Охрид, каде Владата ветуваше дека ќе изгради хотел „Хилтон“. Грдото лице на Охрид е и запуштениот објект на МРТВ и патиштата што водат кон Охрид, рече Петрески на прес-конференција.
Според него, грдото лице на Охрид се и автокамповите, за кои истакна дека законски се прогласени за земјиште од државен интерес, за да можат потоа да бидат продадени по едно евро за метар квадратен и да завршат во приватни бизниси.
За обвинувањата од противкандидатите во врска со средбата со вработените од образованието, Петрески рече дека сите добро знаат за што се зборувало. – Што зборувавме вчера и со жителите на „Железничка“ и со вработените во образованието, тие мошне добро знаат. Граѓаните најдобро ќе ценат и ќе знаат што зборувам јас, а што соопштуваат од ДПМНЕ на пресовите, истакна Петрески.
Напомена дека противкандидатите имаат уште три дена за да соберат храброст и да излезат на телевизиски дуел пред граѓаните. Очекува дека на претстојните избори убедливо ќе го освои третиот мандат.