Со кампањата наречена „Сакаме кул градоначалници за еколошки жешки точки“, еколошките организации упатија и алармираа за најекстремните загадувачи и нивното влијание.
Коалицијата „Екологијата приоритет“, составена од 13 еколошки граѓански организации, испрати апел до кандидатите за градоначалници да реагираат и да го споделат својот план за екстремното загадување. Посочија 15 најголеми загадувачи во земјава, од кои депониите на ОХИС, „Макстил“, „Годел“ и рафинеријата „Окта“ се наоѓаат во Скопскиот регион.
Коалицијата повика кандидатите да потпишат заложба дека доколку бидат избрани, ќе работат на санација и ремедијација на еколошката жешка точка во општината, бидејќи како што велат со децении во повеќе општини се испуштаат 200 милиони тони отпад со хемикалии кои ги загадуваат воздухот, водата, почвата и храната.
„Стотици илјадници граѓани живеат во непосредна близина на опасни места, отворени депонии со арсен, имаат шествалентен хром во бунарите, почвата во која го одгледуваат зеленчукот е загадена со линдан или олово. Последиците од овие хемикалии се страшни. Дополнително, се‘ е оставено на случајна среќа, никој не го едуцирал населението со што живее“, вели екологот Искра Стојковска, на почетокот од кампањата.
Еколозите потенцираат дека по децении откако е променет системот, загадувањето воопшто не е променето, и порачаа нешто да се преземе.