СДСМ и коалицијата „Сојузот за иднината“ од Куманово, синоќа одржаа мини-митинг во населбата Перо Чичо.
На присутните граѓани им се обрати кандидатот за градоначалник на Куманово, Зоран Дамјановски, пратеникот Оливер Спасовски и кандидатите за советници, предводени од носителот на листата Максим Димитриевски.
Дамјановски истакна дека очекува голема победа, која ќе биде услов за влез во нова етапа на развој на Република Македонија.
-На 24-ти граѓаните ќе одлучат дали сакаат прогресивна, напредна, демократска и европска Македонија или сакаат Македонија која што, изминативе седум години е затворена, изолирана, водена само од Груевски и неговото семејство – изјави Дамјановски.
Максим Димитриевски истакна дека нивната партија се обедини со останатите коалициони партии, за да им каже „не“ на неправдата и она што се случува во Македонија.
-Сведоци сме дека секојдневно во Македонија се трошат многу пари. Груевски и семејството не знаат ништо друго освен да градат популистички проекти, споменици, барокни градби, купуваат двокатдни автобуси, но не може само во Скопје да се гради. Ние сакаме да ги споделиме државните средства подеднакво, а не да се скратуваат средствата во нашата општина – нагласи Димитриевски.
Елена Георгиевска