Министерството за транспорт и врски во соработка со општина Центар во деталните урбанистички планови впиша над 20 локации за изградба на катни гаражи, информира денеска ресорниот министер Миле Јанакиески пред катната гаража Судска палата.
Според него, дел од нив, осум се реализираат преку општина Центар, Град Скопје и Акционерското друштво за стопанисување со станбен и деловен простор, а по пат на јавно наддавање се продадени 10 локации.
– Од тие 10 локации две се веќе завршени и ставени во функција. За три објекти има издадено одобрение за градење, а за пет локации треба најдоцна до крајот на годината да се издаде одобрение за градење, во зависност од тоа кога било јавното наддавање или кога се склучил договорот, изјави Јанакиески.
Со сите инвестиции во катни гаражи од општина Центар, Град Скопје, Акционерското друштво и приватни инвеститори, како што рече, бројот на нови паркинг места во општина Центар ќе надмине 5.000.
– Тука не влегуваат монтажните паркинг места и паркинг места што се обезбедени на слободни површини.Над 5.000 паркиг места со изградба на катни гаражи најдоцна треба да се обезбедат до 2017/2018 година, согласно склучените договори за продажба на земјиште по пат на јавно наддавање. Катните гаражи на општина Центар, Град Скопје и Акционерското друштво треба да завршат во наредните две до три години, рече Јанакиески.
Кандидатот за градоначалник на ВМРО-ДПМНЕ и коалицијата „За подобра Македонија“ за општина Центар Владимир Тодоровиќ изјави дека заложбата на општина Центар за решавање на паркинг просторот продолжува и понатаму.
Информира дека во катната гаража кај комплексот судови вчера биле паркирани 456 возила. Потсети дека е почната катна гаража кај „Нова Македонија“, а постојат и монтажни паркинзи на две локации, во Капиштец и во центарот на градот, зад „Мекдоналдс“.