Кандидатот за трет градоначалнички мандат на општина Струмица Зоран Заев денеска се сретна со претставниците на невладиниот сектор. На средбата од двете страни беше потврдена одличната соработка во изминатите осум години која резултира со поголем број реализирани проекти од повеќе области.
Горд сум на сите проекти што се реализирани во Струмица заедно со вас, можам да кажам дека досега 10 насто од проектите во општината се реализирани преку невладините организации и се надевам дека заедничката соработка ќе продолжи и понатаму. Како општина и јас како градоначалник во изминатите осум години дадовме силен придонес во развојот на невладиниот сектор, што не беше така претходно. Отворивме европска канцеларија која на сите невладини организации ќе им биде од огромна корист и ќе можат повеќе да ги ползуваат средствата од европските фондови, а и како општина издвоивме 500 илјади евра финансиска поддршка на невладиниот сектор за наредните четири години, рече Заев.
Тој се сретна и со членовите на струмичката естрада, разговараа за досегашната и идната соработка. Пред претставниците на невладиниот сектор и естрадата, Заев ја промовираше изборната програма за третиот градоначалнички мандат.