Предметите на СЈО не се одлагаа поради вина на судот, туку поради странките во постапката и периодот за овластувања на специјалните јавни обвинители. Ова го изјави претседателот на кривичниот суд, Иван Џолев пред новинарите, и рече дека судот ги прави сите напори со постојната бројка на судии и поротници правдата да биде брза.
Џолев рече дека во судот има 24 високопрофилни случаи, од кои, 22 се на СЈО. “Судиите имаа насорчено рочишта. Тоа не е по вина на судот. Обвинителите во тоа време специјални, тие предмети бараа да се одложат поради овластувањата”, рече Џолев.
“Секој судија е независен. Ние разговараме постојано. Јас барам од судиите да ги убрзаат постапките што се од интерес на јавноста. Тоа секако не по секоја цена”
Џолев рече и дека проблем е тоа што на помошниците судии, Судскиот совет им дава негативни оценки зашто наместо да ги судат нивните предмети, се помошници во други постапки. Претседателот на судот го спомна и проблемот со поротниците. Рече дека онаму каде што има поголеми предмети се трудат и поставуваат дополнителни поротници за секој случај. Истекот на 90 дена, како што кажа Џолев, значи дека судењето формално почнува од почеток со читање на записниците од претходните одржани рочишта. Предметот “Тортура” е еден од предметите, каде што поради смена на поротничката, сите сведоци ќе мора одново да сведочат.
А1он објави дека поради различни околности, половина од предметите на СЈО почнале од почеток.