Обвинителката Фатиме Фетаи пред почетокот на денешното рочиште за предметот „Титаник 3“, прашана да ја коментира улогата на Катица Јанева во аферата што го тресе СЈО, рече дека не сака да се меша во истрагата за случајот „Рекет“.
„Постапката за „Рекет“ ја води друго обвинителство кое е надлежно и не сакам да се мешам“, рече Фетаи.
„Ние како обвинителство продолжуваме со нашата работа. Еве денеска сме на судењето за „Титаник 3“, кажа кратко обвинителката пред почетокот на судењето.
Претходно, специјалната јавна обвинителка, Катица Јанева, не сакаше да ги коментира наводите на Фатиме Фетаи за тензичните случувања во СЈО.
Според информациите, обвинителката Фетаи жестоко се спротивставила на одлуката на својата шефица за претрес при влез и излез од работното место, поради што плукнала во една од надзорните камери во СЈО.