Повеќето грчки медиуми денеска јавуваат за постигнатиот договор за за надминување на политичката криза во Македонија, по вчерашната посета на европската тројка преводена од еврокомесарот Штефан Филе.
„Елефтеротипија“ пишува дека „со посредство на претставници на ЕУ, конзервативниот премиер Никола Груевски и опозицискиот Социјалдемократски сојуз на Бранко Црвенковски се договорија локалните изборида се одржат на 24 март и опозицијата да се врати во Парламентот“.
Како што јави дописникот на МИА од Атина, весникот ја пренесува изјавата на известувачот за Македонија во Европскиот парламент Ричард Ховит дека „договорот е од клучно значење за европската перспектива на земјата“.
„Елефтерос Типос“ додава и дека според договорот ќе се формира двопартиска комисија која ќе ги испита настаните во Парламентот од 24 декември, и оти по локалните избори, „политичките лидери треба да ја разгледаат можноста за предвремени избори во земјата“.
Весникот пишува дека според политичките аналитичари во Скопје, „Бранко Црвенковски бил ’принуден’ да направи повеќе отстапки со цел да се постигне договор“.
„Имерсија“ пишува дека Штефан Филе на својот профил на Твитер напишал оти „средбите што се држаа во Скопје помогнаа политичките лидери во земјата да најдат начин да се надмине кризата“.
„Та Неа“ и „Катимерини“ во врска со вчерашните настани во Скопје пишуваат за судирите меѓу демонстрантите и полицијата за време на протестот пред Владата. Весниците јавуваат дека околу илјада демонстрнти, кои протестираа против назначувањето на Талат Џафери за министер за одбрана, со камења и други премети фрлале по полицијата и оштетиле полициски возила и приватни автомобил на граѓани кои биле паркирани во близина. При протестите се повредени неколку полицајци и уапсени се и некои од демонстрантите кои предизвикаа нереди, информираат грчките весници.