Премиерот Никола Груевски попладнево е во посета на поплавените реони во Штипско и Светиниколско.
Придружуван од министрите за транспорт и врски и за труд и социјална политика Миле Јанакиески и Спиро Ристовски, премиерот Груевски е во обиколка на поплавените куќи, по што ќе ја посетат населбата Ливади во Свети Николе.
Во Штип водата се уште не смее да се користи за пиење. Директорот на ЈП „Исар“ Никола Мицевски вели дека во тек е ставање во функција на останатите бунари и на водоводниот систем со цел населбите во повисоките зони во градот да добијат вода која граѓаните смеат да ја користат само како техничка.
– Во моментов имаме неколку дефекти на водоводната мрежа на кои екипи на ЈП „Исар“ работат за да се санираат. Сметаме дека во текот на наредниот ден т.е. утре граѓаните на Штип ќе имаат вода во водоводниот систем која што не може да се користи се додека не покажат дека се исправни резултатите од анализите коишто ги прави Јавното претпријатие „Исар“ и Центарот за јавно здравје, рече Мицевски.
Што се однесува за селските водоводи во Штип, според направените анализи, сите се во ред, единствено во селото Пиперево анализата покажала дека водата не смее да се користи.