Премиерот Зоран Заев нема да го разреши генералниот секретар на Владата, Драги Рашковски, ниту ќе бара оставка од него по скандалот со објавената аудио снимка поврзана со набавката на радарскиот систем. Според Заев немало ништо незаконски во постапката бидејќи лично од него добил инструкции да ги забрза процесите.
Заев го повтори ставот што Рашковски го кажа, дека се работи за завршен тендер од 2016, но службите не го потпишувале и ја довеле во прашање безбедноста.
Во врска со арогантното однесување на Рашковски кон новинарите и заканите за тужби, Заев вели дека секој како физичко лице има право да сака да го задржи дигнитетот и интегритетот.
– Не гледам ароганција од човек што се извинува до небо, рече Заев и додаде „критички осврт од медиумите треба, но не може да правите салата од некој зашто е јавен функционер“.
„Како физичко лице секој има право да го задржи дигнитетот не може некој да биде боксерска вреќа“, рече Заев.
Тој се извини во име на цела Влада за навредите кон ромската заедница и дополнително најави дека ќе испрати писмо со извинување за Италија.