Судот дал наредба за приведување на експремиерот и бегалец Никола Груевски, кој беше спроведен до судницата со две лица, кои најверјатно, се дел од безбедносните служби на Унгарија. Груевски утрово бил приведен во т.н. 11 област во Будимпешта, а рочиштето за неговата екстрадиција е во тек.
Груевски во судот влезе со палто префрлено преку рацете, веројатно за да ги скрие лисиците од камерите што го снимаа.
Тој носеше и капче, а се забележува дека кога бегал од Македонија имал време да ги земе и скапите очила за кои тој тврдеше дека биле само 300 евра.
Рочиштето е затворено за медиуми, а деталите ќе се знаат по завршувањето. Унгарските новинари велат дека познавајќи го судскиот систем во државата, судот ќе одлучи во корист на Груевски, односно, тој нема да биде екстрадиран во Македонија каде треба да ја одлежи две годишната затворска казна за набавката на луксузниот „мерцедес“.
Последно, Министерството за правда бараше екстрадиција за Груевски и поради крвавите инциденти на 27 април, настан за кој тој е осомничен како еден од организаторите.