Министерот за надворешни работи на Германија Гвидо Вестервеле од попладнево е во Македонија. Ќе разговара со претседателот Ѓорге Иванов, со министерот за надворешни работи Никола Попоски и со лидерот на опозицијата Бранко Црвенковски.
На агендата не е и средба со премиерот Никола Груевски. Од Владата соопштија дека телефонски разговарале вчера, додека дневниот весник Вест во денешното издание пишува дека премиерот немал слободен термин за средба со германскиот министер.
Политичката криза и можностите за нејзино надминување ќе бидат во фокусот на разговорите на шефот на дипломатијата на најмоќната европска земја со неговите соговорници во Скопје.