Петата рунда од политичкиот дијалог под патронат на шефицата на европската дипломатија Кетрин Ештон почнува утре во Брисел, а главна тема ќе бидат институциите на северот на Косово и статусот на офицерите за врска во Белград и Приштина.
Премиерите на Србија, Ивица Дачиќ, и на Косово, Хашим Тачи, ќе се состанат утре околу пладне, прво одвоено со Ештона, а потоа на заеднички ручек, по што дијалогот и формално ќе почне, дознава Танјуг од Европската комисија.
Служебник на ЕК кој побара анонимност, изјави дека е сосема веројатно дека заради сложеноста на проблематиката разговорите ќе продолжат и во среда.
-Ова ќе биде досега најтешката рунда, рече овој функционер на комисијата.
Претходно и од Белград и од Приштина беше најавувано дека оваа рунда примарно ќе биде насочена на прашањето на институциите на северот на Косово што Приштина ги нарекува паралелни, а тоа се пред се судовите, даночната управа и безбедносните структури.