Конечно е најдено решение за „Еурокомпозит“ на што работевме долго време, изјави вицепремиерот Кочо Анѓушев кој денеска во Прилеп се сретна со работниците кои се прогласени за технолошки вишок од оваа компанија.
„Лошата ситуација во „Еурокомпозит“ трае 20-ина години. Интензивно работевме за изнаоѓање решение. Компанијата е со блокирана сметка седум години и не беше лесно. Имаме две можни решенија. Едното е „Еурокомпозит“ да биде саниран во постојниот формат доколку се случат некои договори. Ако тоа не се случи за 10 дена, иако очекуваме резултати, тогаш второто решение е моделот како за Фени да го примениме во овој случај. По 45 дена, доколку уште е со блокирана сметка, да отиде во стечај, но со реструктуирање. Најден е инвеститор кој ќе ја санира состојбата и во најголем дел ќе се погрижи за вработените, да ги обештети, но истовремено фабриката да продолжи да работи“, рече тој.
Според Пеце Велјаноски од Иницијативниот одбор на работниците прогласени технолошки вишок, тие повторно за 15-ина дена ќе имаат средба со Анѓушев, но бараат освен отпремнините да ги добијат во целост и несплатените придонеси за околу 6 години.