Министерството за надворешни работи на Колумбија го критикуваше Еквадор за депортирање на голем број колумбиски граѓани без формален протокол, опишувајќи го како „непријателски гест“.
Во меѓувреме, еквадорските власти изјавија дека депортациите се извршени во согласност со законските процедури и стандардите за човекови права, објави Ројтерс.
Колумбиската влада соопшти дека властите во соседниот Еквадор објавиле планови за депортирање на Колумбијци кои моментално се притворени во разни еквадорски затвори.
„Преку дипломатски канали, Колумбија формално поднесе најсилен протест до еквадорската влада поради овој непријателски чин и моментално разгледува соодветни контрамерки“, соопшти колумбиското Министерство за надворешни работи.
Во соопштението се нагласува дека Еквадор ја презел акцијата „без да спроведе никаков протокол што би гарантирал безбеден, уреден и прифатлив трансфер на затвореници, во согласност со човековите права“.
Министерството за надворешни работи на Еквадор соопшти дека ја информирало Колумбија преку дипломатски канали за поединечните постапки за депортација што започнале на 8 јули, нагласувајќи дека процесот е спроведен во согласност со прописите.
„Затоа Еквадор ги отфрла обвинувањата за масовни депортации“, соопшти еквадорското Министерство за надворешни работи.
Во меѓувреме, градоначалникот на колумбискиот пограничен град Ипијалес потврди дека околу 700 колумбиски затвореници биле испратени преку мостот што ги поврзува Колумбија и Еквадор без претходно официјално известување.