Ќерката на ликвидираниот руски опозициски лидер Борис Немцов во интервју за „ВВС“ вели дека Владимир Путин е одговорен за смртта на нејзиниот татко.
Триесетгодишната Жана Немцова истакна дека моќниот руски претседател е „политички виновник“ за убиството, кое се случи на 27-ми февруари во вечерните часови во близина на Кремељ.
-Мојот татко беше најистакнат критичар на Путин. Беше најмоќен опозициски лидер во Русија. По неговата смрт опозицијата е обезглавена и сите се исплашени- вели таа и напоменува дека Борис Немцов се борел исклучиво со Путин и никој друг.
Според неа сега опозицијата во Русија нема доволно моќна, стручна и искусна личност која е во состојба да се конфронтира со власта.
Таа додава и дека истражителите досега воопшто не ја контактирале и дека верува дека причина за тоа е што не се заинтересирани за независна истрага.
Инаку според наводите на медиумите Путин јавно го осуди убиството, нареди истрага и изрази сочувство на мајката на Немцов, а Кремељ ги отфли тврдењата дека има врска со ликвидацијата.
Истрагата е насочена кон тезата дека опозиционерот е убиен поради тоа што го осуди масакрот во редакцијата на „Шарли Ебдо“, поради што неодамна беа приведени неколку лица од Чеченија, а едниот од нив признал и дека е вмешан, иако се појавија тврдења дека тоа признание е изнудено со тортура.
Жана Немцова за „ВВС“ вели дека се уште не и е дозволено да влезе во станот на нејзиниот татко, во кој ги чувал сите важни документи.
Е.Г.