Земјите на Вишеградската група (В4) – Полска, Словачка,Унгарија и Чешка, сакаат да привлечат повеќе инвестиции од Швајцарија.
Ова во Братислава, на средба со швајцарскиот претседател Дидие Буркхалтер го договориле премиерите на В4, јави дописникот на МИА од Прага.
Според чешкиот премиер Бохуслав Соботка, државите на Вишеградската четворка имаат интерес за јакнење на меѓусебните трговски односи и соработка во областа на истражувањето и развојот.
Во врска со кризата во Украина, премиерите заклучиле дека е неопходно да се инсистира на почитување на меѓународното право, а според полската премиерка Ева Копачова, ЕУ треба да биде подготвена да ги заостри антируските санкции.
– Украинската криза покажа дека е неопходно да се инсистира на почитување на меѓународното право. Организацијата за безбедност и соработка во Европа (ОБСЕ) може да игра позитивна улога во спроведувањето на мировните договори од Минск и Чешка е подготвена да ги поддржи нејзините активности во Украина, рече Соботка.
Токму Швајцарија, од 1 јануари ја презема функцијата претседавач на ОБСЕ и според Бурхалтер, безбедноста на Европа мора да биде заеднички проект.