Украинскиот претседател Володимир Зеленски изјави дека Украина го финализира мировниот документ од 20 точки и дека „наскоро“ ќе им го претстави на Соединетите Американски Држави.
Украина и Соединетите Американски Држави денес ќе одржат нови разговори за повоена обнова и економски развој, рече Зеленски во објава на социјалната мрежа X.
„Ја финализираме работата на основниот документ од 20 точки што би можел да ги дефинира параметрите за завршување на војната и очекуваме наскоро да го доставиме до Соединетите Американски Држави, по нашата заедничка работа со тимот на претседателот Трамп и партнерите во Европа“, рече Зеленски.
Тој најави дека по разговорите ќе следи виртуелен состанок на таканаречената Коалиција на волјата.
„Работиме многу продуктивно за да обезбедиме безбедност во иднина и да спречиме повторување на руската агресија“, додаде Зеленски.