Украинскиот претседател Володимир Зеленски, изјави дека воведувањето санкции против Русија од страна на претседателот на Соединетите Американски Држави, Доналд Трамп, не ја ослободува Украина од потребата да купува ракети со долг дострел.
Во интервју за американскиот портал „Аксиос“, Зеленски рече дека американскиот претседател е „загрижен за можна ескалација“, но дека, и покрај ова, на Украина ѝ е потребна конкретна воена поддршка.
„Санкциите се едно такво оружје, но ни требаат и ракети со долг дострел“, рече украинскиот претседател.
Тој, исто така, најави дека таканаречената „коалиција на добронамерните“ ќе подготви план за прекин на огнот во Украина во следните седум до десет дена.
„Неколку кратки точки. На пример, план за прекин на огнот. Решивме да работиме на тоа во текот на следната недела или десет дена“, рече Зеленски, додавајќи дека рускиот претседател Владимир Путин „веројатно нема да го прифати“ планот.
Доналд Трамп неодамна изјави дека не ја исклучува можноста за воведување дополнителни санкции против Русија, додавајќи дека „мирот ќе биде можен само кога двете страни ќе бидат подготвени да постигнат договор“.