Украинскиот претседател Володимир Зеленски изјави дека Русија ја користи нуклеарната централа Запорожје за воени цели, вклучително и напади врз украински градови и складирање оружје, додавајќи дека електраната досега била целосно без струја 14 пати.
Зборувајќи на Меѓународната конференција за реконструкција и нуклеарна безбедност во Чернобил, Зеленски рече дека руските сили „ја претвориле најголемата нуклеарна централа во Европа во инструмент на војна“, објави украинскиот УНИАН.
„Тие ги гранатираат нашите градови и села од територијата на електраната, таму складираат оружје, муниција и воена опрема, а периметарот на објектот е миниран“, рече Зеленски.
Тој додаде дека градот Енергодар, каде што се наоѓа електраната, е „де факто заложник“, истакнувајќи дека нуклеарната централа Запорожје веќе претрпе целосен прекин на електричната енергија 14 пати.
