Украинскиот претседател Володимир Зеленски денес изјави дека Украина не препорачува претставниците на земјите блиски до Русија да останат во Москва околу 9 мај, кога руската престолнина го одбележува Денот на победата во Втората светска војна, поради, како што изјави, руските напади и закани.
„Имаме и апели од некои земји блиски до Русија чии претставници планираат да останат во Москва. Тоа е чудна желба во овие околности. Ние не го препорачуваме тоа“, рече Зеленски во видео обраќање, пренесува Укринформ.
Тој потсети дека Украина претходно предложила прекин на огнот, вклучително и од 6 мај, но дека, како што тврди, одговорот на Русија бил продолжување на нападите и заканите, објави Укринформ.
„Тие сакаат да добијат дозвола од Украина да ја одржат својата парада, безбедно да излезат на плоштадот по еден час еднаш годишно, а потоа да продолжат да ги убиваат нашите луѓе и да водат војна“, рече Зеленски.
