Украинскиот претседател Володимир Зеленски за време на брифингот за медиумите по разговорите во Белата куќа со американскиот претседател Доналд Трамп изјави дека најтешкото прашање за време на мировниот процес за Украина ќе биде прашањето за територијата, но нагласи дека прво мора да се постигне прекин на огнот.
– Нашиот став е прво да се постигне прекин на огнот за да можеме да седнеме на преговарачката маса, да разговараме, да ги разбереме нашите позиции. Мислам дека ова е многу важен прв чекор, рече Зеленски, додавајќи дека американскиот претседател ја разбира оваа позиција.
Украинските медиуми објавија дека за време на средбата меѓу Трамп и Зеленски, клучното прашање биле начините за вршење притисок врз Русија со цел да се постигне мир.
Пред средбата со Зеленски, Трамп разговарал со рускиот лидер Владимир Путин и оценил дека разговорот бил „многу продуктивен“.
Трамп рече дека ќе се сретне со Путин во Будимпешта за да разговара за „можноста за завршување на неславната војна меѓу Русија и Украина“.