Украинскиот претседател Володимир Зеленски изјави дека бара мировниот договор да содржи конкретен датум за влез на Украина во Европската Унија, бидејќи во спротивно Русија, преку своите претставници, ќе се обиде да го забави овој процес.
„Сакам точен датум. Ве уверувам, ако договорот, кој го потпишаа Америка, Русија или (рускиот претседател Владимир) Путин, јас како претседател на Украина и Европа, нема датум, Русија подоцна ќе направи сè за да го блокира процесот. И не мора со свои раце, туку со рацете на одредени претставници на Европа“, рече Зеленски, пренесува Укринформ.
Тој посочи дека пример за таква ситуација е денешната неможност за отворање на преговарачки кластери.
„Сведоци сме дека кластерите не се отвораат, имаше проблеми со кандидатурата… Затоа, за нас, уште еднаш, ЕУ значи конкретни резултати, бидејќи, повторувам, таа претставува и безбедносни гаранции“, нагласи украинскиот претседател.
Зеленски додаде дека Украина ќе направи сè за да биде технички подготвена за членство во 2027 година.
„Барем ќе ги направиме главните работи“, рече тој.
Како што објави Укринформ, повикувајќи се на Блумберг, ЕУ разгледува различни опции за вклучување на членството на Украина во иден мировен договор.