Засега се уште не е позната локацијата на подморницата Титан, која се упати кон потонатиот брод Титаник, ниту пак здравствената состојба на нејзината екипа. тие се заробени во длабочините на океанот во мала и тесна подморница на која и снемува кислород.
Кен Ледез, експерт за хипербарична медицина, изјави за Би-Би-Си дека не е само недостатокот на воздух што им се заканува на оние во подморницата. Бродот можеби изгубил електрична енергија, што може да создаде проблеми со контролирање на количината на кислород и јаглерод диоксид во подморницата.
Како што се намалува нивото на кислород, процентот на јаглерод диоксид што го вдишува екипажот се зголемува, а тоа може да има фатални последици. „Како што се зголемува нивото на јаглерод диоксид, тој станува седатив, како гасот за анестезија и ќе го заспие екипажот изјави Ледез.
Поранешниот капетан на подморницата на Кралската морнарица, Рајан Ремзи, ги анализираше снимките од внатрешноста на Титан на интернет и рече дека не го видел системот за отстранување на јаглерод диоксид, познат како чистач. „Тоа, за мене, е најголемиот проблем од сите нив“, смета Ремзи.
Покрај тоа, екипажот е изложен на ризик од хипотермија, односно премногу ниска телесна температура. Ремзи наведува дека температурата на водата, доколку подморницата е на морското дно, е околу 0 степени. И ако изгубиле струја, нема да можат да ја загреат подморницата.
Ако екипажот е погоден од хипотермија, ако нема доволно кислород и ако јаглерод диоксид се акумулира во кабината, прашање е дали ќе можат да испратат повици за помош, односно да се обидат да стапат во контакт со потрагата и спасувачката мисија, на пример со удирање на трупот на подморницата во редовни интервали.
„Ако се онесвестени, нема да можат да направат многу“, рече Ледез. Иако крајбрежната стража предупреди дека на екипажот веројатно нема кислород, оние што се во подморницата би можеле да направат неколку работи за да го продолжат снабдувањето.
Ремзи наведува дека во таа ситуација би било паметно да го забавите дишењето, иако признава дека е многу тешко да се направи ова во стресни околности.
Што се однесува до храната и водата, крајбрежната стража вели дека екипажот имал „ограничени оброци“ на бродот, но не може да каже колку. И покрај сите овие предизвици, Ледез смета дека операцијата за пребарување и спасување не треба да се откажува предвреме, додавајќи дека екипажот би можел да преживее извесно време дури и со ниски нивоа на кислород.