Иранскиот министер за надворешни работи Мохамед Џавад Зариф упати критика до барањата за повлекување на сирискиот претседател Башар Асад, нагласувајќи дека таквите барања само ќе ја продолжат граѓанската војна во Сирија.
Според Зариф оние кои инсистираат на протерувањето на Асад се одговорни за крвопролевањата во Сирија.
Тој не посочи конкретна земја, но според западните медиуми ги имал предвид повиците на Турција и Саудиска Арабија за повлекување на Асад. Двете сунитски држави ги поддржуваат бунтовниците, кои се борат против сирискиот претседател.
Зариф ова го изјави на заедничката прес-конференција со шпанскиот министер за надворешни работи Хозе Мануел Гарсија, кој е во посета на Иран, кој истакна дека сириската криза не може да се реши со воени средства.
Според Гарсија само сирискиот народ има право да одлучи што ќе се случи со Асад.