Маж вооружен со нож држи како заложник вработена во супермаркетот „Реве“ во берлинската населба Мариенфелде, непосредно од пред затворањето на продавницата во петокот вечерта, соопшти германската полиција.
In Berlin-Marienfelde läuft aktuell noch ein Einsatz nach einer Geiselnahme in einem Supermarkt. https://t.co/pNep3QmSdQ pic.twitter.com/8dFPXfYK1k
— Lars Wienand (@LarsWienand) July 10, 2026
Инцидентот се случил околу 22 часот, кога, според сведоци, мажот дошол до касата, одбил да ги стави производите на подвижната лента, а потоа извадил нож, пренесува „Билд“.
Еден од вработените успеал да избега од продавницата, додека неговата колешка останала внатре со напаѓачот и оттогаш се наоѓа како заложник.
„Голем број полициски службеници се на местото на настанот. Заложничката криза е во тек“, изјави портпаролот на берлинската полиција.
Полицијата соопшти дека осомничениот и понатаму се наоѓа во супермаркетот и дека преку преговори се обидува мирно да ја разреши ситуацијата. Засега не е познато каков е односот меѓу напаѓачот и заложничката, ниту во каква здравствена состојба се наоѓа жената.
На местото на настанот се распоредени специјални полициски единици, екипи на итната медицинска помош и лекари, а поширокото подрачје околу супермаркетот е целосно обезбедено.
Во текот на ноќта полицијата ги сослушувала сведоците, меѓу кои вработени и купувачи кои во моментот на инцидентот се наоѓале во продавницата, но засега не се објавени дополнителни детали за случајот.