Србија е влечена во конфронтација со Русија безмилосно и со притисок, но прашањето е колку Србија ќе ѝ се спротивстави, изјави портпаролката на руското Министерство за надворешни работи, Марија Захарова.
Во интервју објавено денес за ТАСС на Меѓународниот економски форум (СПИЕФ) во Санкт Петербург, Захарова рече дека изјавите на српскиот претседател Александар Вучиќ покажуваат дека нема такви планови.
„Гледаме како Србија во суштина бескрајно е влечена во конфронтација со Русија. Тие го прават тоа со притисок, го прават тоа безмилосно. Прашањето е, секако, колку Србија ќе се спротивстави. Бидејќи не станува збор само за Русија, туку првенствено за самата Србија“, рече Захарова.
Таа нагласи дека односите со Русија отсекогаш ѝ носеле на Србија само позитивни работи – помош, поддршка, понекогаш спасение, економски придобивки, развој и решенија за итни прашања.
„И кога Србија се свртува против нашата земја, тогаш, во суштина, Србија се свртува против себе. Не затоа што Србија е наш застапник. И не станува збор само за вистински братските врски што нè обединуваат“, рече Захарова.