Русија решително ги поддржува легитимните власти на Република Српска, изјави денес портпаролката на руското Министерство за надворешни работи Марија Захарова, коментирајќи ја пресудата на Судот на Босна и Херцеговина, со која претседателот на РС Милорад Додик е осуден на една година затвор и шестгодишна забрана за политичка активност.
„Силно ги поддржуваме легитимните власти на Република Српска, чии напори се насочени кон заштита на нивниот уставен статус во согласност со Општиот рамковен (Дејтонски) договор за мир во Босна и Херцеговина од 1995 година, со кој се утврдени принципите на суверенитет, територијален интегритет и еднаквост на трите државотворни народи и два ентитета со широки овластувања“, рече Захарова, како што е објавено на веб-страницата на руското Министерство за надворешни работи.
Таа истакна дека Русија има намера да употреби политички средства за да спречи ескалација на тензиите во БиХ предизвикани од Западот.