Маж од албанско потекло (46 годишен) почина синоќа околу 22 часот за време на обид за кражба во вила во близина на Арецо, во централна Италија.
Несреќата се случи додека тој бегаше од имотот со двајца соучесници, кои сè уште се во бегство. Неговото тело е пронајдено во лозје во близина на куќата.
Истрагата на имотот, кој се состои од две поврзани вили, ја спроведоа обвинителите заедно со карабинерите, кои беа повикани од сопственикот, пишува „Ил Месаџеро“.
Откако се вклучи алармот, зет на сопственикот на една од куќите, пензиониран адвокат, испука куршум во воздух за да ги исплаши и избрка крадците.
Бегајќи од имотот, 46-годишникот се заплетка во шилеста, електрифицирана мрежа што претходно беше инсталирана за заштита од диви животни.
Имено, во таа област има чести проблеми со диви свињи и волци. Тој успеа да направи уште неколку чекори пред да се сруши, а неговите соучесници го оставија и избегаа.
Обдукцијата, која веќе е наредена, ќе утврди дали смртта е предизвикана од руптура на феморалната артерија или од други повреди здобиени при падот.
Утрово карабинерите се вратија на местото на настанот за дополнителна истрага.