Компанијата Икс, поранешна компанија на Твитер во сопственост на Илон Маск, се согласила да плати отштета од околу 10 милиони долари на поранешниот претседател Доналд Трамп како дел од спогодбата за суспензијата на неговата сметка во 2021 година, дознава Волстрит џурнал.
Ова е втора голема финансиска победа за Трамп по ред, откако компанијата Мета неодамна се согласи да плати дури 25 милиони долари отштета, од кои значителен дел ќе биде насочен кон изградбата на претседателската библиотека на Трамп.
Тужбата против мрежата X првично беше отфрлена од судија во 2022 година, но адвокатите на Трамп поднесоа жалба на таа одлука. Трамп ги тужеше Твитер, Мета и Јутјуб откако овие платформи му забранија пристап до нив по немирите на 6 јануари 2021 година, тврдејќи дека суспензијата ги прекршила неговите права од Првиот амандман.
Она што е особено интересно е фактот дека спогодбата дојде и покрај блиските врски меѓу Илон Маск и Доналд Трамп. Маск не само што ја врати сметката на Трамп на платформата X веднаш по преземањето на компанијата во 2022 година, туку и инвестираше најмалку 250 милиони долари во кампањата на Трамп во 2024 година.
Според Волстрит журнал, правниот тим на Трамп планира да бара спогодба со Гугл, со што би завршиле серија тужби против големите технолошки компании поради суспензијата на неговите сметки.