Вработените во американската авиокомпанија Боинг во Сиетл стапија во штрајк за прв пат по 16 години, откако членовите на нивниот најголем синдикат, кој претставува 33.000 вработени, ја отфрлија понудата за нов договор и избраа прекин на работата.
Според извештаите, 94,6 отсто од членовите на синдикатот гласале против новиот договор, а 96 отсто го поддржале штрајкот. Работата беше официјално прекината на полноќ по локално време, пренесува Bloomberg.
„Нашите членови денеска зборуваа јасно и гласно“, рече претседателот на синдикатот на Боинг, Џон Холден по гласањето.
Според него, понудата на Боинг не е доволна да се компензира за 16 години стагнација на платите, повисоки трошоци за здравствена заштита и преместување на работните места.
Сепак, Холден изрази подготвеност да се врати на преговарачка маса со раководството на Боинг што е можно поскоро.
„Боинг“ на своите вработени им понуди загарантирано зголемување на платите од 25 отсто во следните четири години, но работниците очекуваа повеќе и беа разочарани што компанијата го откажа годишниот бонус.
Боинг го произведува авионот 737 Max во фабриката во Рентон на периферијата на Сиетл, а моделите 777 и 767 во својата фабрика во Еверет северно од градот.
Штрајкот практично ќе го запре производството на комерцијални авиони во еден од најголемите американски производствени гиганти, што може да и наштети на целата економија на Соединетите Американски Држави, јавува Си-Ен-Ен.