Две вооружени лица извршија грабеж во една луксузна продавница во Единбург, при што однесоа накит и скапи машки и женски часовници во вкупна вредност од 1,2 милиони евра.
Шкотската полиција соопшти дека грабежот се случил доцна синоќа и започната е опсежна потрага по крадците, кои побегнале во непознат правец.
Станува збор за две лица, кои со моторцикли влегле во продавницата, ги искршиле со секири витрините и од нив земале се што им се нашло на дофат. Еден од крадците. кој носел пушка, грабнал една од продавачките и ја присилил да ја отвори витрината што била најблиску до неа. Жената по грабежот била ослободена и не била повредена.
Крадците имале заштитни шлемови на главата, кои целосно им го покривале лицето, што дополнително им ја отежнува работата на полицијата за идентификување на крадците.